Ikaw ay dagat.
Angkin mo ang karikitang
umuukit sa aking balintataw
Di matumbasan ang
Iyong pinagtagpi-tagping
kalaliman
na nais ninomang
sisirin,
yapusin.
Agos na naising damhin
bawat hampas ng alon ay
sampal na maligayang tatanggapin
Hingang malalim…
Di na nais pang pumangibabaw
masilayan lamang ang
misteryosong kababalaghan
pinipilit usisain na
parang duyog,
mahirap isipin
tila badhi
na mahirap bilangin
mga talang mahirap hagilapin
Ikaw ay dagat
at ako ay namulat
sa dagli-dagli mong pag-alat
kung ang hatid nito
sa aking balat ay
lagkit at hapdi
na sa bawat pag-ahon
ay di maikukubli
lubos kong nanamnamin
di na hihilingin
na lisanin ang
kaibuturan mong lihim
pagkat ang manatili sa
iyong piling, kahit pa anong
yaman sa mundo ay dadaigin.
ang buo kong pagkatao
ay iyong pukawin
akitin, panglaw ay hawiin
Ako ay balutin,
lukuban ng Iyong
kabanalan at damdamin.
Ikaw ay dagat.
Ika’y aking lalanguyin.
Ikaw ay dagat.
Ako ay Iyong lunurin.
Ikaw ay dagat
na aking sisisirin.
Ikaw ay
DAGAT.